ឃាត់ ២នាក់ ប្តីប្រពន្ធលក់ខោអាវតាមអនឡាញបានហើយ ក្រោយជេរប្រមាថធ្ងន់ធ្ងរជាសាធារណៈលើអតិថិជន ដោយសមត្ថកិច្ចឱ្យធ្វើកិច្ចសន្យាអប់រំ

(សៀមរាប) ៖ សមត្ថកិច្ចខេត្តសៀមរាប នៅរសៀលថ្ងៃទី៣០ ខែមេសា ឆ្នាំ២០២៤ បានស្វែងរកឃើញ និងតាមឃាត់ ២នាក់ ប្តីប្រពន្ធលក់ខោអាវតាមអនឡាញបានហើយ ក្រោយជេរប្រមាថធ្ងន់ធ្ងរជាសាធារណៈលើអតិថិជន នាពេលថ្មីៗនេះ។

លោកឧត្តមសេនីយ៍ទោ ហួត សុធី បានអះអាងថា ២នាក់ ប្ដីប្រពន្ធនេះ ត្រូវបានធ្វើកិច្ចសន្យាអប់រំ នៅប៉ុស្ដិ៍នគរបាលរដ្ឋបាលសាលាកំរើក ហើយសាមីខ្លួនបានធ្វើការសុំទោសជាសាធារណៈ សន្យាបញ្ឈប់ការប្រើប្រាស់ពាក្យសម្ដីជេរប្រមាថ ឬខុសឆ្គងតទៅទៀត។

សូមបញ្ជាក់ថា នៅថ្ងៃទី២៩ ខែមេសា លោកស្រី ញ៉ែម មរកត រដ្ឋលេខាធិការក្រសួងកិច្ចការនារី បានចេញមុខមកការពារស្រ្តីម្នាក់ជាអតិថិជននៅខេត្តប៉ៃលិន ក្រោយ ២នាក់ ប្តីប្រពន្ធជេរប្រមាថខ្លាំងៗ រឿងទិញខោអាវ។

លោកស្រី បញ្ជាក់ថា «យើងរួមគ្នាលើកកម្ពស់សីលធម៌សង្គម មិនគួរឱ្យមនុស្ស ២នាក់ បំផ្លាញសីលធម៌សង្គមអ៊ីចឹងទេ រកស៊ីនៅខេត្តសៀមរាបផង ថ្ងៃណាមួយគាត់អាចមានរឿងជាមួយភ្ញៀវទេសចរជាតិ អន្តរជាតិទៀតក៏ថាបាន បើពួកគាត់និយាយស្តីគ្មានដឹងខ្យល់អីយ៉ាងនេះ»។

ស្ត្រីលក់អនឡាញខាងលើ លើកឡើងចំពោះអតិថិជនថា «សង្វេគហ្អែងណាស់ហង អត់មានលុយ ១រៀលផង កុម្ម៉ង់អីវ៉ាន់គេ» ខណៈបុរសជាប្តី ក៏លើកឡើងថា «ភ្ញៀវដូចចែឯងរាងប្រកាច់ៗ កន្ត្រាក់ៗអីចឹង ទើបជក់ថ្នាំហើយរាងបែកៗ ធ្វើចរិតថោកទាប គេជេរហើយ»។

តាមការបញ្ជាក់របស់ស្រ្តីជាអតិថិជន ដែលត្រូវបានគេចែកចាយព្រោងព្រាតតាមបណ្តាញសង្គមអមដោយសាររិះគន់ខ្លាំងៗចំពោះ ២នាក់ ប្តីប្រពន្ធនោះ គាត់បានបាញ់លុយដែលកុម្ម៉ង់ទិញខោអាវរួចហើយ តែ ៣ថ្ងៃក្រោយ មិនទាន់ទទួលឥវ៉ាន់ ក៏គាត់សួរនាំ ប៉ុន្តែត្រូវបាន ២នាក់ ប្តីប្រពន្ធចេញមកជេរប្រមាថយ៉ាងខ្លាំងៗទៅវិញ៕