ដំណឹងល្អ !ទីបំផុត អាជ្ញាធរអប្សរាបើកទូលាយឱ្យថតរូប និងវីដេអូសម្រាប់ផ្សព្វផ្សាយនៅតំបន់អង្គរវិញហើយ
យោងតាមសេចក្ដីជូនដំណឹងរបស់អាជ្ញាធរអប្សរាបានឱ្យដឹងថា ការថត ផ្សព្វផ្សាយក្នុងប្រព័ន្ធបណ្ដាញសង្គម ដូចជា Facebook, Youtube , Tik Tok ….តាមទូរសព្ទដៃ ពុំចាំបាច់ដាក់ពាក្យស្នើសុំទេ ប៉ុន្តែអាជ្ញាធរហាមថតរូបអាសអាភាស និងសកម្មភាពប៉ះពាល់ដល់តម្លៃសីលធម៌ និងវប្បធម៌នៅគ្រប់ផ្នែកទាំងអស់នៃសេវាទូទៅ ។
មួយវិញទៀត ការថតរូបក្នុងសម្លៀកបំពាក់អាពាហ៍ពិពាហ៍ ចងក្រងជាអនុស្សាវរីយ៍ផ្ទាល់ខ្លួន ទាំងជាតិ និងអន្តរជាតិ ដោយពុំប្រើប្រាស់ឧបករណ៍ ដ្រូន ដែលកន្លងមកតម្រូវឱ្យស្នើសុំច្បាប់នោះ ពេលនេះអាជ្ញាធរក៏អនុញ្ញាតឱ្យថតដោយពុំចាំបាច់ដាក់ពាក្យស្នើសុំនោះទេ។
ថ្មីៗនេះដែរ មានអ្នកផលិតមាតិកាបណ្ដាញសង្គមអន្តរជាតិដ៏ល្បីមួយក្រុមបានមកដល់ប្រទេសកម្ពុជា និងបានទៅថតវីដេអូដើម្បីផ្សាព្វផ្សាយតាមបណ្ដាញសង្គម យូធូប ត្រូវបានមន្ត្រីអាជ្ញាធរអប្សរាហាមនិងត្រូវឱ្យពួកគេទៅសុំច្បាប់ដើម្បីអាចថតបាន។ ការសុំច្បាប់របស់អាជ្ញាធរនាពេលកន្លងមកគឺត្រូវរង់ចាំក្នុងរង្វង់មួយសប្ដាហ៍ ខណៈភ្ញៀវទេសចរជាតិ និងអន្តរជាតិគេមកលេងអង្គរវត្តត្រឹមរយៈពេល២ទៅ៣ថ្ងៃយ៉ាងយូរ នឹងត្រលប់ទៅកាន់តំបន់ទេសចរណ៍ផ្សេងទៀតឬត្រលប់ទៅប្រទេសកំណើតវិញ ដូច្នេះការតម្រូវឱ្យដាក់ពាក្យស្នើសុំនោះ បានធ្វើឱ្យបាត់បង់ចំនួនទេសចរច្រើននៅតំបន់រមណីយដ្ឋាន ជាក់ស្ដែងក្នុងពេលបច្ចុប្បន្ននេះ ចំនួនភ្ញៀវទេសចរទៅកម្សាន្ត និងទស្សនារមណីយដ្ឋានអង្គរមានការធ្លាក់ចុះគួរឱ្យកត់សម្គាល់៕
