ម្ចាស់និងនាយកប្រតិបត្តិ កម្មវិធីផ្ញើសារដ៏ល្បីរបស់ពិភពលោក App Telegram ត្រូវប៉ូលិសបារាំងចាប់ខ្លួន
ប្រទេសបារាំង៖ លោក ផាវែល ឌូរ៉ូវ (Pavel Durov) ជាម្ចាស់ និងនាយកប្រតិបត្តិ កម្មវិធីផ្ញើសារដ៏ល្បីរបស់ពិភពលោក App Telegram ត្រូវបានចាប់ខ្លួន នៅព្រលានយន្តហោះ ប៊ូហ្គេត (Bourget) ស្ថិតនៅជាយទីក្រុងប៉ារីស ក្នុងប្រទេសបារាំង ខណៈដែលលោកធ្វើដំណើរតាមយន្តហោះផ្ទាល់ខ្លួនទៅកាន់ទីនោះ។
នេះបើយោងតាមសារព័ត៌មាន Reuters និងសារព័ត៌មានធំៗរបស់អន្តរជាតិ បានចេញផ្សាយនៅព្រឹកថ្ងៃអាទិត្យ ទី២៥ ខែសីហា ឆ្នាំ២០២៤។
ការចាប់ខ្លួននេះធ្វើឡើងបន្ទាប់ពី មហាសេដ្ឋី លោក ផាវែល ឌូរ៉ូវ (Pavel Durov) បានធ្វើដំណើរចេញពីប្រទេស អាស៊ែបៃហ្សង់ (Azerbaijan) ទៅកាន់ប្រទេសបារាំង ហើយត្រូវបានប៉ូលិសចាប់ខ្លួននៅទីនោះ នាល្ងាចម៉ោង៨យប់ (ម៉ោងក្នុងប្រទេសបារាំង) ត្រូវថ្ងៃទី២៤ ខែសីហា ឆ្នាំ២០២៤ គាត់ត្រូវបានចោទប្រកាន់ពីបទ បដិសេធមិនត្រួតពិនិត្យ Data នៃវេទិការបស់គាត់ រួមមាន៖ ភេវរកម្ម ការជួញដូរ ការសមគំនិត ការក្លែងបន្លំ ការលាងលុយកខ្វក់ និងច្រើនទៀត៕
បន្ទាប់ពីមានដំណឹងអំពីការចាប់ខ្លួនរបស់គាត់ ស្ថានទូតរុស្ស៊ីនៅប្រទេសបារាំងបានប្រាប់ទីភ្នាក់ងារព័ត៌មានរដ្ឋ តាស (TASS) របស់រុស្ស៊ីថា ពួកគេមិនត្រូវបានទាក់ទងដោយក្រុមរបស់លោក ឌូរ៉ូវ (Durov) ទេ ប៉ុន្តែកំពុងចាត់វិធានការភ្លាមៗដើម្បីបញ្ជាក់អំពីស្ថានការណ៍នេះ។
តំណាងរុស្ស៊ីប្រចាំអង្គការអន្តរជាតិនៅទីក្រុងវីយែន លោក ម៉ាកខាយ យូយ៉ានូវ (Mikhail Ulyanov) រួមជាមួយអ្នកនយោបាយរុស្ស៊ីផ្សេងទៀត បានថ្កោលទោសយ៉ាងឆាប់រហ័សចំពោះការចាប់ខ្លួននេះ ដោយចោទប្រកាន់ប្រទេសបារាំងថាប្រព្រឹត្តដូចជាផ្តាច់ការ។ លោក យូយ៉ានូវ (Ulyanov) បានព្រមានថា បុគ្គលដែលដើរតួនាទីសំខាន់ក្នុងលំហព័ត៌មានអន្តរជាតិមិនមានសុវត្ថិភាពក្នុងការទៅទស្សនាប្រទេសនានាដែលកំពុងឈានទៅរក “សង្គមផ្តាច់ការកាន់តែច្រើន” ទេ។
ជាការឆ្លើយតប អ្នកសរសេរប្លុករុស្ស៊ីមួយចំនួនបានអំពាវនាវឱ្យមានការតវ៉ានៅខាងក្រៅស្ថានទូតបារាំងទូទាំងពិភពលោកនៅម៉ោង ១២ ថ្ងៃត្រង់នៅថ្ងៃអាទិត្យនេះ។
