ប៉ូលិសខេត្តសៀមរាបម្នាក់ ស្លាប់ដោយសារជួបគ្រោះថ្នាក់ចរាចរណ៍ នៅផ្លូវក្រវ៉ាត់ក្រុងសៀមរាប

ខេត្តសៀមរាប៖ ប៉ូលិសខេត្តសៀមរាបម្នាក់ ស្លាប់ដោយសារជួបគ្រោះថ្នាក់ចរាចរណ៍ ហេតុការណ៍នេះបានកើតឡើង កាលពីវេលាម៉ោង​ ​១៦៖០៥នាទីរសៀល ថ្ងៃទី​២៤ ខែវិច្ឆិកា​ ឆ្នាំ២០២៤​ លេីតាមបណ្តោយផ្លូវក្រវ៉ាត់ក្រុង ទល់មុខស្ថានីយ៍ប្រេង ប៉ាប៉ាប្រេត្រូលែម (ចាស់) ស្ថិតនៅភូមិថ្មី សង្កាត់ស្វាយដង្គំ ក្រុងសៀមរាប ខេត្តសៀមរាប។

ជនរងគ្រោះមានឈ្មោះ ឃឹម​ គីរី​ ភេទប្រុស​ អាយុ​ ៣៨ឆ្នាំ មុខរបរនគរបាលខេត្តសៀមរាប តួនាទីឋានៈជានាយរងការិយាល័យផ្សព្វផ្សាយ នៃស្នងការនគរបាលខេត្តសៀមរាប​ រស់នៅភូមិសាលាកន្សែង សង្កាត់ស្វាយដង្គំ ក្រុងសៀមរាប ខេត្តសៀមរាប។ មើលរូបភាពសពច្បាស់ៗចុចចូលគ្រុបតេឡេក្រាម 👉 t.me/siemreaptoday/20229

ប្រភពពីពលរដ្ឋនៅកន្លែងកើតហេតុបានប្រាប់ថា៖ មានម៉ូតូមួយគ្រឿង ម៉ាក​ហុងដាឌ្រីម ពណ៌ខ្មៅ​​ ពាក់ស្លាកលេខ​ សៀមរាប 1Q-6651 បើកបរដោយឈ្មោះ ឃឹម​ គីរី​ មានទិសដៅពីកើតទៅលិច មកដល់ចំណុចផ្លូវកោង កន្លែងកើតហេតុខាងលើ បានប៉ះរថយន្តមួយគ្រឿង ម៉ាកហាយឡែនដឺ មិនស្គាល់ផ្លាកលេខ ដែលបើកបរមានទិសដៅពីលិចទៅកើត ក្នុងទិសដៅផ្ទុយគ្នា ហើយក៏បានរេចង្កូតដួលទៅខាងធ្វេងផ្លូវ ត្រូវរថយន្តដឹកទំនិញមួយគ្រឿងទៀត ម៉ាកហាន់ដាយ ៣.៥តោន ពាក់ស្លាកលេខ ត្បូងឃ្មុំ 3A-0420 បុកចំពីមុខរថយន្ត បានបណ្តាលឲ្យដួលបោកក្បាលនៅនិងថ្នល់បណ្តាលឲ្យស្លាប់ភ្លាមៗនៅនឹងកន្លែង ។ ប្រភពបានបន្តទៀតថា៖ រថយន្ត ហាយឡែនដឺ ក្រោយកើតហេតុបានរត់គេចទៅទិសខាងកើត ចំណែករថយន្តដឹកទំនិញ ឈប់នៅនឹងកន្លែង តែអ្នកបេីកបរបានរត់គេចខ្លួនបាត់ ។

ក្រោយពីកើតហេតុ កម្លាំងសមត្ថកិច្ចចរាចរណ៍ផ្លូវគោក បានចុះទៅដល់ទីតាំងកើតហេតុ បានវាស់វែងកត់កំណត់ហេតុ និងនាំយកវត្ថុតាងទាំងពីរយកទៅរក្សាទុកនៅស្នាក់ការរង់ចាំការដោះស្រាយតាមនីតិវិធី ។ ចំណែកសពជនរងគ្រោះ បានដឹកយកទៅធ្វើបុណ្យតាមប្រពៃណី នៅវត្តអារញ្ញសាគរ ក្រុងសៀមរាប។