ស្នងការដ្ឋាននគរបាលខេត្តកំពត សុំឱ្យមានការពិចារណាមុន នឹងយករូបភាពទាក់ទង នឹងរូបសំណាកសេះសមុទ្រមកបង្ហោះ
ខេត្តកំពត៖ ស្នងការនគរបាលខេត្តកំពត លោកឧត្តមសេនីយ៍ទោ ម៉ៅ ច័ន្ទមធុរិទ្ធិ បានស្នើសុំឱ្យបងប្អូនប្រជាពលរដ្ឋយមានការពិចារណាដោយខ្លួនឯងថាអ្វីសមរម្យនិងអ្វីដែលមើលទៅមិនសមរម្យ មុននឹងយករូបភាពទាក់ទងនឹងរូបសំណាកសេះសមុទ្រមកបង្ហោះ។
ស្នងការដ្ឋានខេត្តកំពតនៅថ្ងៃទី២៦ ខែមេសា ឆ្នាំ២០២៤នេះ បានបង្ហោះសារតាមរយៈហ្វេសប៊ុកផ្លូវការដែលមានខ្លឹមសារថា៖ “ មិនចង់វែកញែកអ្វីឱ្យវែងឆ្ងាយនោះទេ ចំពោះរូបទាំងបីនេះសុទ្ធតែមិនសមរម្យទាំងអស់ ក៏ប៉ុន្តែសូមបងប្អូនទាំងអស់ពិចារណាដោយខ្លួនឯងថា តើរូបទាំងបីនេះវាមានអ្វីដែលមើលទៅមានលក្ខណៈអាសអាភាសមិនសមភ្នែក និងមិនមានសីលធម៌សម្រាប់សង្គមជាតិយើង ។
ស្នងការដ្ឋានខេត្តកំពតបានបន្តថា “ យើងខ្ញុំមិនមានការតឹងតែងរឹតត្បិតឬមានបំរាមក្នុងការមកថតលេងនៅរូបសំណាកសេះសមុទ្រឬនៅតំបន់ទេសចរណ៏ផ្សេងៗក្នុងខេត្តកំពតនោះទេ យើងខ្ញុំមានតែអរគុណដល់បងប្អូននៅទូរទាំងប្រទេសដែលបានអញ្ជើញមកលេងកំសាន្តនៅខេត្តកំពតរបស់យើង! សូមបងប្អូនទាំងអស់គ្នាពិចារណានិងគិតដោយខ្លួនឯងថាអ្វីសមរម្យនិងអ្វីដែលមើលទៅមិនសមរម្យ”៕
អត្ថបទ៖ ទ្រី ហៀន
